ललितपुर, ४ असोज

नेपाल राष्ट्र बैंकका पूर्व निर्देशक श्यामकृष्ण दाहालले सहकारीमा आएको समस्यालाई कम गर्नका लागि कर्जा सूचना केन्द्र तत्काल स्थापना गर्नु पर्नेमा जोड दिनु भएको छ । राष्ट्रिय सहकारी बैंक बागलुङ शाखाले आयोजना गरेको २ दिने सम्पत्ती शुद्धिकरण निवारण तथा गोएमल सम्बन्धी तालिम शुभाम्भका अवसरमा बोल्दै दाहालले कर्जा सूचना केन्द्र स्थापनामा जोड दिनु भएको हो । सहकारी अभियानको जोड कर्जा सूचना केन्द्र स्थापनामा हुनु पर्ने हो, अभियानको ध्यान खास विषयमा नगएर अन्यत्र मोडिएको हो कि ? भन्ने आशंका व्यक्त गर्दै दाहालले अभियान एकतावद्ध भएर कर्जा सूचना केन्द्र स्थापनामा लाग्नु पर्ने बताउनु भयो ।

एउटा सहकारीमा खराव ऋणी बनेको मान्छे, अर्को सहकारीमा जान्छ र ऋण उपयोग गर्छ, एउटा व्यक्ति दर्जनौ सहकारीको सदस्य बन्ने र त्यहाँबाट ऋण लगेर नतिर्ने गरेका उदाहरणहरु छन, पूर्व निर्देशक दाहालले भन्नुभयो,–‘सहकारीको ऋण गलत व्यक्तिमा जान नदिनका लागि तुरन्तै कर्जा सूचना केन्द्रको आवश्यकता छ ।’