ललितपुर । नेपालमा सहकारी स्थापना भएको दिनको सम्झना गर्दै हरेक वर्षको चैत्र २० गते मनाइने  सहकारी दिवस यस वर्ष पनि ‘मर्यादित सहकारी : समुन्नत समाज’ भन्ने नाराका साथ ६८औं राष्ट्रिय सहकारी दिवस देशैभर राष्ट्रिय सहकारी बैंकको सक्रिय सहभागितामा विभिन्न कार्यक्रमहरूका साथ भव्य रूपमा सम्पन्न भएको छ ।

बुधवार काठमाडौंमा भूमि व्यवस्था, सहकारी तथा गरिबी निवारण मन्त्रालय र सहकारी अभियानको संयुक्त आयोजनामा भव्य कार्यक्रम भएको थियो । 

भूमि व्यवस्था, सहकारी तथा गरिबी निवारण मन्त्री बलराम अधिकारीको अध्यक्षतामा भएको कार्यक्रमको उद्घाटन कार्यवाहक प्रधानमन्त्री तथा शहरी विकास मन्त्री प्रकाशमान सिंहले गर्नुभयो ।

कार्यक्रमका प्रमुख अतिथि समेत रहनु भएका मन्त्रीे सिंहले सहकारी मर्यादित हुनसके मात्रै समुन्नत देश र समाज निर्माणको आधार तयार गर्न सकिने बताउनुभएको छ ।

६८ औं राष्ट्रिय सहकारी दिवस तथा अन्तर्राष्ट्रिय सहकारी वर्ष २०२५ मूल समारोहलाई बुधवार सम्बोधन गर्दै कार्यवाहक प्रधानमन्त्री सिंहले यस्तो बताउनुभएको हो ।

उहाँले सार्वजनिक निजी र सहकारी क्षेत्रको सहभागिता र स्वतन्त्र विकासमार्फत राष्ट्रिय अर्थतन्त्र सुदृढ गर्ने नीति र सहकारी क्षेत्रलाई प्रवद्र्धन गर्दै राष्ट्रिय विकासमा अत्याधिक परिचालन गर्ने नीति संविधानमा नै उल्लेख गरेर सहकारीलाई संविधानमा नै आत्मसाथ गर्ने रूपमा छुट्टै पहिचान स्थापित गरेको बताउनुभयो । सिंहले नेपालमा सहकारी अभियान र सरकार सँगसँगै हातेमालो गरेर अगाडि बढिरहेको कुरामा जोड दिनु भयो ।

नेपालमा रहेका ३१ हजार भन्दा बढी सहकारी संस्थाहरूमध्ये केही संख्यामा रहेका सहकारीहरूमा मात्र सर्वसाधारण जनताको बचत रकम फिर्ताको समस्या देखिएको बताउनुभयो । 

कार्यवाहक प्रधानमन्त्री सिंहले सहकारी ऐनमा समसामयिक संशोधन गरी राष्ट्रिय सहकारी नियमन प्राधिकरणको स्थापनाको साथै अन्य व्यवस्थाहरू गरी सहकारी क्षेत्रमा देखिएका समस्याहरू समाधान गर्न, सहकारी क्षेत्रमा सुशासन कायम गर्न कटिबद्ध रहेको बताउनुभयो । सर्वसाधारणको सबै बचत सहज रूपमा फिर्ता गराउन सहकारी अभियानले पनि थप दायित्वबोध गर्नुपर्ने उल्लेख गर्नुभयो ।

उहाँले सहकारीमा महिलाहरूको सहभागिता ५६ प्रतिशत रहेको बताउँदै, जसले महिला सशक्तीकरण र विकासमा योगदान दिएको बताउनुभयो । सहकारी आफैँमा आर्थिक, सामाजिक जागरणको अभियान भएको बताउनुभयो । सहकारी क्षेत्रलाई संविधानले गरिबी न्यूनीकरण, आत्मनिर्भर, दिगो एवम् समाजवाद उन्मुख राष्ट्रिय अर्थतन्त्रको एक महत्त्वपूर्ण आधार स्तम्भको रूपमा स्वीकार गरेको बताउनुभयो ।

भूमि व्यवस्था, सहकारी तथा गरिबी निवारण मन्त्री बलराम अधिकारीले सहकारीलाई तीन खम्बे अर्थ नीतिको एक खम्बा हो भन्ने प्रमाणित गर्न सबैले भावनात्मक रूपले अगाडि बढ्न जरुरी रहेको बताउनुभयो ।

उहाँले सहकारी ऐन, ०७४ ले सहकारीका समस्याहरू अटाउन नसकेको कारण सरकारले अध्यादेशमार्फत कानुन बनाएको स्पष्ट पार्नुभयो । सरकारले सहकारीहरूको व्यवस्थापनका लागि नियमन प्राधिकरण, कर्जा असुली न्यायाधिकरण तथा बचत सुरक्षण कोष आवश्यक रहेको महसुस गरेर ऐन संशोधन गरेको उल्लेख गर्नुभयो । 

राष्ट्रिय सहकारी महासंघ लिमिटेड नेपालकी अध्यक्ष ओमदेवी मल्लले सहकारी क्षेत्रको समस्यालाई समाधान गरी कसरी अघि बढ्ने भन्ने मुख्य कुरा रहेको उल्लेख गर्दै यसका लागि राष्ट्रिय कानुन तथा सहकारीका अन्तर्राष्ट्रिय मूल्य, मान्यता र सिद्धान्तलाई आत्मसात् गरेर अघि बढ्नु पर्ने आवश्यक्ता रहेको बताउनुभयो ।

कार्यक्रममा राष्ट्रिय सहकारी गानको सार्वजनिकिकरण भएको छ, कार्यक्रमका प्रमुख अतिथि प्रकाशमान सिंहले अडियो बजाएर लोगोको सार्वजनिकिकरण गर्नुभयो । 

त्यसै गरी अन्तर्राष्ट्रिय सहकारी वर्ष २०२५ को लोगो लोकार्पण सहित प्रमुख अतिथि र अतिथिहरूले हस्ताक्षर गर्नुभएको छ । लोगोमा राष्ट्रिय सहकारी बैंकको तर्फबाट बैंकका अध्यक्ष महेन्द्र कुमार गिरीले हस्ताक्षर गर्नुभयो ।

कार्यक्रममा भूमि व्यवस्था, सहकारी तथा गरिबी निवारण मन्त्रालय सचिव एवम् अध्यक्ष राष्ट्रिय सहकारी नियमन प्राधिकरण अध्यक्ष अर्जुन पोखरेल, राष्ट्रिय सहकारी महासंघका संस्थापक अध्यक्ष तथा सल्लाहकार दीपक प्रकाश वास्कोटा, सल्लाहकार एवम् ने.क.पा.माओवादी केन्द्रको सहकारी विभागका प्रमुख लीलामणि पोखरेल, सल्लाहकार एवम् नेपाली काँग्रेसको सहकारी विभागका प्रमुख देवेन्द्रराज कँडेल, सल्लाहकार एवम् ने.क.पा.एमालेको सहकारी विभागका प्रमुख खगराज अधिकारीले शुभकामना मन्तव्य राख्नु भएको थियो ।

कार्यक्रममा राष्ट्रिय सहकारी वैंकका अध्यक्ष महेन्द्र कुमार गिरी सहित सहकारी विभागका रजिष्ट्रार, केन्द्रीय सहकारी संघका अध्यक्ष तथा प्रतिनिधिहरू, प्रदेश, जिल्ला सहकारी संघका अध्यक्ष तथा प्रतिनिधिहरू, सञ्चारकर्मीहरू लगायत सहकारीकर्मिहरुको सहभागिता रहेको थियो ।

त्यसै गरी देशका अन्य स्थानहरूमा समेत अन्तरक्रिया, छलफल लगायत विभिन्न कार्यक्रम गरी राष्ट्रिय सहकारी दिवस भव्य रूपमा मनाइएकोे छ ।