सप्तरी । राष्ट्रिय सहकारी बैंक लिमिटेड राजविराज शाखाको आयोजनामा दुई दिवसीय ऋण व्यवस्थापन तालिम सप्तरीको राजविराजमा सम्पन्न भएको छ ।
सोमबार देखि सुरु भएको तालिममा सहकारीले सदस्यहरूलाई ऋण लगानी गर्दा अपनाउनु पर्ने विधिहरू, आवश्यक कागजातहरू, धितो मूल्याङ्कन, जमानत लगायत सम्भावित जोखिम कम गर्न सहयोग पु¥याउने उद्देश्यका साथ तालिम सञ्चालन गरेको शाखा प्रमुख बिरबल कुमार राजवंशीले जानकारी दिनु भयो ।
तालिममा कर्जाको परिचय र महत्व, कर्जा लगानीका प्रक्रियाहरू, आवश्यक कागजात, धितो मूल्याङ्कन, जोखिम पहिचान र व्यवस्थापन, सहकारीको कर्जा असुली सम्बन्धी कानुनी व्यवस्थाहरू, कर्जा वर्गीकरण, कर्जा असुलीका उपायहरू, यसको कानुनी प्रक्रिया लगायतका विषयमा बैंकको तालिम अधिकृत राजकुमार बरालले सहजीकरण गर्नुभएको थियो ।
शाखा समन्वय उपसमिति संयोजक गणेश कुमार आसको अध्यक्षतामा भएको कार्यक्रमको प्रमुख अतिथि बैंकका सञ्चालक एवम् मधेस प्रदेशका संयोजक विश्वनाथ मण्डल रहनुभएको थियो ।
शाखा प्रमुख बिरबल कुमार राजवंशीले सञ्चालन गर्नुभएको तालिममा विभिन्न सहकारी संस्थाबाट २६ जना कर्जा विभागका कर्मचारी तथा कर्जा उपसमितिका पदाधिकारीहरूको सहभागिता रहेको थियो ।
