ललितपुर । राष्ट्रिय सहकारी बैंक लिमिटेड नयाँबजार शाखाको आयोजनामा सञ्चालित एक दिवसीय कर्जा तथा कानुनी व्यवस्थापन तालीम सम्पन्न भएको छ ।
बुधवार सञ्चालित तालिममा सहकारीले सदस्यहरूलाई ऋण लगानी गर्दा अपनाउनु पर्ने विधिहरू, आवश्यक कागजातहरू, धितो मूल्याङ्कन, जमानत लगायत सम्भावित जोखिम कम गर्न सहयोग पु¥याउने उद्देश्यका साथ तालिम सञ्चालन गरेको शाखा प्रमुख बिनिता बिष्टले जानकारी दिनु भयो ।
तालिममा कर्जाको परिचय र महत्व, कर्जा लगानीका प्रक्रियाहरु, आवश्यक कागजात, धितो मूल्याङ्कन, जोखिम पहिचान र व्यवस्थापन, सहकारीको कर्जा असुली सम्बन्धी कानुनी व्यवस्थाहरू, कर्जा वर्गीकरण, कर्जा असुलीका उपायहरू, यसको कानुनी प्रक्रिया लगायतका विषयमा बैंकको प्रमुख जोखिम अधिकृत प्रमोद कुमार घिमिरे र इन्जिनियर मुक्ति पाण्डेले सहजीकरण गर्नु भएको थियो ।
कार्यक्रमको सञ्चालन शाखा प्रमुख बिनिता बिष्टले गर्नुभएको थियो । तालिममा विभिन्न सहकारी संस्थाबाट २६ जना कर्जा विभागका कर्मचारी तथा कर्जा उपसमितिका पदाधिकारीहरूको सहभागिता रहेको थियो ।
