माघ ११, ललितपुर । राष्ट्रिय सहकारी बैंक लिमिटेड हरिवन शाखाको आयोजनामा सहकारीमा लेखा सुपरिवेक्षण समितिको प्रभावकारीता विषयक २ दिने तालिम बिहीबार सम्पन्न भएको छ ।
शाखाको कार्यक्षत्रमा रहेको सहकारी संस्थाको लेखा सुपरिवेक्षण समितिका संयोजक तथा सदस्यहरु सहभागि तालिमको बुधबार बैंकका सञ्चालक एवम् मधेश प्रदेशका संयोजक विश्वनाथ मण्डलले उद्घाटन गर्नु भएको थियो ।
उद्घाटन पछि कार्यक्रममा सम्बोधन गर्दै सञ्चालक मण्डलले सहकारी स्वनियमनमा संचालन हुने भएकाले लेखा सुपरिवेक्षण समितिको महत्वपूर्ण भूमिका रहेको औल्याउनुभयो । उहाँले यो समिति सक्रिय भएको खण्डमा सहकारी सुशासन र पारदर्शी तवरमा संचालन हुने समेत जिकिर गर्नुभएको थियो । लेखा सुपरिवेक्षण समितिको भूमिका महत्वपूर्ण भएकाले यसलाई सक्रिय बनाउने उद्देश्यले बैंकको यो कार्यक्रम गरेको उहाँले बताउनुभयो ।
शाखा समन्वय उपसमितिका संयोजक केशव प्रसाद ढकालको अध्यक्षतामा भएको उक्त तालिममा सहकारीको परिचय र सिद्धान्तहरु व्यवहारीक प्रयोग, संस्थागत संरचना र सञ्चालन प्रक्रिया, आन्तरिक लेखापरिक्षणका क्षेत्र–आन्तरिक कार्यविधि कार्यान्वयन लेखापरिक्षण अभ्यास, आन्तरिक लेखापरिक्षणका क्षेत्र–संस्थागत सुशासन र कानुनको पालना, लेखापरिक्षण अभ्यास, लेखासुपरिवेक्षण समितिको परिचय तथा कार्यहरु, आन्तरिक लेखापरिक्षण प्रतिवेदन निर्माण शिप, आन्तरिक लेखापरिक्षणका क्षेत्र– साधारण सभा र निर्णय पालना, सदस्य सेवा लेखापरिक्षण अभ्यास, आन्तरिक लेखापरिक्षणका क्षेत्रको–अभिलेख व्यवस्थापन लेखापरिक्षण अभ्यास, आन्तरिक लेखापरिक्षणका क्षेत्र–वित्तीय व्यवस्थापन र लेखापरिक्षण अभ्यासको विषयमा बैंकको तालिम विभागका सहायक तालिम अधिकृत राजकुमार बरालले सहजीकरण गर्नुभएको थियो ।
