आश्विन २४, ललितपुर
राष्ट्रिय सहकारी बैंक लिमिटेडको आयोजनामा “दिगो, पारदर्शी र जोखिम रहित सहकारीः लेखा सुपरीवेक्षण समितिको जिम्मेवारी” भन्ने थिम सहित आश्विन २५, २६ गते हुने लेखा सुपरीवेक्षण समितिको राष्ट्रिय गोष्ठी–२०८० को सम्पूर्ण तयारी पुरा भएको छ ।
राजधानीको होटल याक एण्ड यतिमा आयोजना हुने गोष्ठिमा सरकारी प्रतिनिधिहरु, सहकारी संघ/संस्थाको लेखा सुपरिवेक्षण समितिका संयोजक तथा सदस्यहरु, स्थानिय तहका प्रतिनिधि, गैरसरकारी संघ संस्थाका प्रतिनिधिहरु, सहकारी र सहकारीका सरोकारवाला निकायका प्रतिनिधिहरु र विदेशी पाहुनासहित ५ सय जना भन्दा बढीको सहभागीता रहने बैंकले जनाएको छ ।
बैंकले पहिलो पटक गर्न लागेको गोष्ठीमा सहकारी संघ/संस्थाहरुको आन्तरिक नियन्त्रणका लागि प्रभावकारी औजार तथा प्रणाली विकासका सम्बन्धमा बहस र छलफल हुने छ । दुई दिन सम्म सञ्चालन हुन गइरहेको राष्ट्रिय गोष्ठीमा राष्ट्रिय तथा अन्तर्राष्ट्रिय विषय विज्ञहरुद्वारा ८ वटा विषयहरुमा कार्यपत्र प्रस्तुत हुनेछन् । सहकारीको आन्तरिक नियन्त्रण प्रणाली, वित्तीय क्षेत्रको नियामक र सहकारीका विज्ञहरुबाट सञ्चालन गरिने गोष्ठीबाट सहकारीको मूल्य, सिद्धान्त र सहकारीको दर्शन र स्वनियमनमा आधारित भएर सहकारी संस्थाहरु सञ्चालित हुने र लेखा सुपरिवेक्षण समितिको कार्यक्षेत्रभित्र रहेका सहकारी संस्थाको आन्तरिक नियन्त्रण प्रणालीलाई बलियो बनाउनको लागि नीतिगत विषयमा दक्षता अभिवृद्धि हुनेछ ।
त्यसैगरी विद्यमान अवस्थामा सहकारी क्षेत्रमा देखिएका चुनौति पहिचान गरी समाधानको लागि संस्थागत तयारी गर्न मद्दत पुग्ने अपेक्षा गरिएको बैंकका अध्यक्ष के.बी. उप्रेतीले जानकारी दिनुभयो ।
